2 drug dens ni-raid, 16 tiklo

Dalawang drug dens ang nalansag habang 16 na hinihinalang sangkot sa ilegal na droga ang natimbog sa magkahiwalay na buy-bust operation sa Valenzuela City.

Ayon kay Valenzuela Police Chief P/Col. Carlito Gaces, alas-2:45 kahapon ng madaling-araw nang masakote ng mga operatiba ng Station Drug Enforcement Unit (SDEU) sa pangunguna ni P/Capt. Segundino Bulan, Jr. sina Billy Abad, 39, at Elmer Martin, 46, matapos magbenta ng sachet ng shabu sa poseur-buyer kapalit ng P200 marked money sa Bgy. Gen. T. de Leon.

Ani Col. Gaces, nadiskubre na ang bahay ni Martin ay ginagamit umanong drug den matapos maaktuhang nagsa-shabu sa loob sina Luis Calisaan, 46; Dexter Tamaña, 43; Jackson Palos, 41, at Mark Lagansua, 42.

Narekober kay Abad ang dalawa pang sachets ng shabu at buy-bust money habang ang ilang plastic sachets na may bahid ng shabu at ilang drug paraphernalias ay nakuha sa loob ng bahay ni Martin.

Alas-2:20 ng madaling-araw nang madamba ng mga operatiba ng SDEU sina Jerald Parungao, 32, at Archie Tolentino, 39, sa buy-bust operation sa Bgy. Malinta habang sina Fernando Padasas, 44; Ronell Soriano, 31, at Louie Prospero, 22, ay naaktuhan namang sumisinghot ng shabu sa loob ng bahay.

Anim na sachets ng shabu, P300 buy-bust money at ilang drug paraphernalias ang nakumpiska sa mga suspek.

Nauna rito, alas-8:00 ng Martes ng gabi, timbog din ng operatiba ng SDEU sina Angelo Pabaya, 30; Maritess Bartolome, 31; Oscar Ucsan, 37; Jomar Dominic San Diego, 22, at Arnel Osico, 29, sa buy-bust operation sa kanto ng Sabino Alley, Bgy. Maysan at nakumpiska sa mga ito ang apat na sachets ng shabu at P300 marked money.