Gymnast Yulo, pasok na sa Tokyo Olympics

Photo : PSC

Inilatag ni National Gymnasts Carlos Edriel “Caloy” Yulo ang magandang performance sa ginaganap na 49th Artistic Gymnastics World Championships upang maging ikalawang Filipinong atleta na nag-qualify para sa 2020 Tokyo Olympics sa susunod na taon.

Ito ay matapos ilabas ng International Gymnastics Federation (FIG) ang listahan ng mga panibagong kuwalipikado sa 2020 Summer Olympics na gaganapin sa Tokyo, Japan simula Hulyo 25 hanggang Agosto 9, 2020.

Napabilang ang pangalan ng 19-year-old sensation sa pinakabagong inilabas na listahan ng FIG sa Artistic Gymnastics na qualified sa quadrennial meet. Kasalukuyan pa ring sumasabak sa World Championships si Yulo sa Hanns-Martin-Schleyer-Halle Arena sa Stuttgart, Germany simula pa nitong Linggo, (Okt. 6) hanggang na magtatapos sa Okt. 13.

Nakuha ng 2018 Doha World Championships bronze medalist ang qualifying mark nang lumapag ito sa 7th place sa Floor Exercise na may 14.6333 mark at All Around Performance sa 18th place na may 82.164. Ang All-Around performance ay kinabibilangan ng mga puntos ni Yulo sa Floor (14.633), Pommel Horse (12.466), Rings (13.166), parallel bars (14.433), vault (14.433) at Horizontal bar (13.033). Lumapag din sa 12th place si Yulo sa vault at 22nd place sa Parallel Bars.

Kasama na si Yulo sa 222 kabuuang atleta sa buong mundo mula sa Artistic (79 men at 81 women) at Rhytmic (17 Individual at 45 Group) gymnastics, habang magsasagawa pa ng qualifying sa Trampoline sa world championships sa Nob. 28-Dis 1 sa Tokyo, Japan.

Ang Filipino artistic gymnasts ay ang ikalawang Filipino na lalahok sa 2020 Olympic Games kasunod ng Pole Vaulter na si Ernest Obiena na nakuha ang personal best na 5.81 mark sa Auction Meeting in the Square Pole Vault 2019 sa Italy. Malaki rin ang inaasahan ng Teikyo University student sa Japan na mapagtatagumpayan an ang gold medal sa 30th edition ng Southeast Asian Games sa men’s artistic gymnastics sa Dis. 1-9 sa Philsports Arena ngayong taon.