Boxers Marcial at Gabuco, 'di padadaig sa 30th SEAG
- Gerard Arce
- Oct 5, 2019
- 2 min read
Pangungunahan nina 2019 World Championship silver medalist Eumir Felix Marcial at Asian Championships gold medal winner Josie Gabuco ang kampanya ng Philippine National Boxing team sa 30th Southeast Asian Games sa Nob. 30-Dis. 11, 2019 na idaraos sa iba’t ibang panig ng Luzon.
Naging matayog ang lipad ni 2nd class Airman Marcial nang mag-2nd place sa 2019 AIBA World Championships sa Yekaterinburg, Russia sa middleweight category (75kgs) noong Set. 9-21. Dedepensahan niya ang korona sa biennial meet sa Dis. 2-7 na idaraoas sa PICC.
Makakasama ng 23-anyos na back-to-back SEA Games gold medal winner sina 2018 Asian Games bronze medalist Carlo Paalam (light flyweight, 49 kg), Jakarta-Palembang Games silver medalist Rogen Ladon (flyweight, 52 kg), 2015 SEA Games gold medalists Ian Clark Bautista (bantamweight, 56 kg), 2016 Rio Olympics representative at 2014 Incheon Asian Games silver medalist Charly Suarez (lightweight, 60 kg), James Palicte (light welterweight, 64 kg), Joel Bacho (welterweight, 69 kg) at John Tupas-Marvin (light heavyweight, 81 kg).
Sa kababaihan, babanat ang nag-iisang gold medalist ng bansa sa World Amateur boxing na si Gabuco sa 2012 Qinhuangdao Championships kasama ang line-up nina Irish Magno (flyweight, 48 kg), Aira Villegas (bantamweight, 54 kg), 2014 Jeju City World Silver medalist Nesthy Petecio (featherweight, 57 kg) at Risa Pasuit (lightweight, 60 kg).
Inaasahan ng Association of Boxing Alliances in the Philippines (ABAP) na mahihigitan pa ng pambansang koponan ang 2-1-2 gold-silver-bronze medal ng bansa sa 2017 Kuala Lumpur Games.
Noong Singapore 2015 Games ay nakuha ng Pilipinas ang overall title sa pamamagitan ng 5-3-2 medal tally sa 11 gold medal event mula sa men at women’s category.
Hahawakan nina coaches Ronald Chavez ang men’s team, habang si head coach Nolito Velasco sa women’s team at foreign consultant Don Abnett ang pambansang koponan na umaasang mapapanatili ng koponan ang eksaktong line-up hanggang sa pagsabak ng mga ito sa biennial meet.
Comments