Misis na supplier ng droga sa selda, tiklo

Hindi na nakalabas ng Manila Police District-Station 4, ang misis na nadiskubreng supplier ng shabu sa ilang preso, kamakalawa ng gabi sa Sampaloc, Manila.

Kinilala ang suspek na si Aileen Manuzod alyas Aida, 34, ng Bgy. 420, Zone 43, Sampaloc habang ang inmate na huling inaabutan nito ng droga ay si Abdullah Ampatua, 21.

Ayon kay PCol. Robert Domingo, nagduda umano sila kay Manuzod matapos makakita ng shabu at mga drug paraphernalias sa selda kaya inobserbahan ang babae na madalas dumadalaw sa kanyang asawang si Russel Cumigad.

Nang muling dumalaw ang ginang, inobserbahan na ito ng mga pulis kung saan nakitang pumunta ito sa kabilang selda at may dinukot sa ilalim ng kanyang short at iniabot kay Ampatua.

Dito na siya sinita ni Patrolman Bernadeth Mapue at nakuha sa kamay ni Ampatua ang dalawang sachets ng shabu at P600 naman kay Manuzod.