Yulo, bibida sa FLG artistic Gymnastics World C’Ships

Tutulak na ang FIG Artistic Gymnastics World Championships sa Stuttgart, Germany simula ngayong Biyernes, Okt. 4, 2019 at isa ang mukha ng Philippine Gymnastics na si Carlos Ed­riel Yulo sa mga nakalista sa gustong magmarka sa ma­tinding kompetisyon.

Patapos na ang kasalu­kuyang taon at hindi natiti­nag sa unahang puwesto sa Federation Internationale de Gymnastique (FIG) world ranking ng Men’s Artistic Gymnastics - floor exercise ang 19-anyos na Pinoy na nagsimula sa larangang ito noong 7- taong gulang pa lang siya at ngayon ay nag-aambisyon nang makasabak at makakuha ng ginto sa 2020 Tokyo Olympics.

Si Yulo ay may rekord na 70 puntos para trang­kuhan ang Male Gymnasts sa floor exercise sa buong mundo. Tinuntungan ng Pi­noy ang pag-akyat sa podi­um ng mga bakbakan sa Ger­many, Australia at Qatar.

Sa 43rd Turnier der Meister FIG Individual Ap­paratus World Cup noong 2018 sa Cottbus, Germany, sumikwat siya ng 20 puntos dahil sa pagiging tersera. Nanggulat siya sa Australia matapos itong magkampeon sa Melbourne FIG World Cup 2019 at kumulekta ng 30 puntos. Nadagdagan din ng 20 puntos ang kartada dahil sa pagiging 1st runner-up sa Doha FIG World Cup sa Qatar.

Ang Kastilang si Ray­der­ley Zapata na naka-po­dium sa Melbourne (19 pun­tos) Baku (20 puntos) at Doha (25 puntos) nakatutok sa binatilyong Pinoy at ba­hagyang nalalamangan lang ni Yulo ng anim na pun­tos. Ang dalawang korona na inangkin ni Artem Golgop­yat ng Israel ay sapat na para mahawakan niya ikatlong baytang dala ang 60 puntos.

Kasalukuyang gumaga­bay kay Yulo bilang coach ay si Munehiro Kugimiya ng Japan kung saan naka­base ang Pinoy bilang bahagi ng Japanese Gymnastics Trai­ning Center sa Tokyo.