Pagbili ng alak, pinag-awayan.. Mister, todas sa katoma

Utas ang 54-anyos na obrero makaraang hatawin ng kawayan ng kanyang kainuman sa Cauayan City, Isabela, kamakalawa.

Kinilala ang biktima na si Joseph Bautista habang ang suspek ay si Roberto Tagaca, 55, kapwa residente ng Bgy. Zone 3, Research Minante 1.

Batay sa imbestigasyon, nag-iinuman ang dalawa nang biglang magtalo.

Sinasabing napikon ang suspek kaya kinuha ang kawayan na malapit sa kanilang pinag-iinuman at inihataw sa batok ng biktima bago tumakas.

Sa presinto na napag-alaman na ang ugat ng pagtatalo na nauwi sa krimen ay kung sino ang bibili ng alak.