Talo sa partylist.. Mocha, bagong Deputy Admin ng OWWA

Itinalaga ni Pangulong Rodrigo Duterte si dating Communications Assistant Secretary Mocha Uson bilang bagong Deputy Executive Director of the Overseas Workers Welfare Administration.

Batay ito sa bagong listahan ng mga presidential appointee mula sa Malacañang. Sa kanyang radio program, mas lalo aniya na magkakaroon ng oras si Uson para tutukan ang mga pangangailangan ng mga overseas Filipino worker kabilang na ang pagtatatag ng Department for OFWs.

Matatandaang, si Uson ay isa sa mga celebrity na mahigpit na nangampanya para kay Pangulong Duterte noong 2016.

Unang itinalaga si Uson bilang communications assistant secretary noong May 2017 ngunit, nagbitiw nitong nakalipas na taon sa gitna ng mga kontrobersiya.

Tumakbo rin siya bilang first nominee ng AA Kasosyo Partylist, na layuning matulungan ang mga overseas worker at maging matagumpay na entrepreneur.

Bigo naman na makakuha ng sapat na boto ang naturang partylist group noong May 2019 elections.

Kabilang din sa mga itinalaga sina Department Secretaries Ernesto Pernia, Carlos Dominguez, Wendel Avisado, Delfin Lorenzana, Carlito Galvez, Jr., Mark Villar, Arthur Tugade bilang ex-officio members ng Legislative-Executive Development Advisory Council.