Hirit sa Kamara.. Phaseout sa jeep, subsidy sa private cars, imbestigahan

Nais ni House Deputy Minority Leader at Bayan Muna Rep. Carlos Zarate na maimbestigahan sa Kamara ang planong pagtatanggal sa mga jeep habang magbubuhos umano ng subsidiya para sa produksiyon ng mga pribadong sasakyan.

Diin ni Zarate, hindi katanggap-tanggap na ang drayber at operator ay maaaring matanggalan ng hanapbuhay sa phaseout ng mga jeep at pinagtitiis ng gobyerno habang may subsidiya ang malalaking kumpanya.

Ang binabanggit ni Zarate na subsidiya ay ang P27 bilyong Comprehensive Automotive Resurgence Strategy (CARS) program na nag-oobliga sa mga kumpanya na gumawa ng hindi bababa sa 200,000 units ng kada brand ng sasakyan sa loob ng anim na taon.

Dismayado ang kongresista na mas inuna pa aniya ng pamahalaan na tulungan ang malalaking kumpanya kaysa magbigay ng subsidiya sa rehabilitasyon at maintenance ng mga pampasaherong jeep.