Estudyante, 4 pa kulong sa droga

Limang hinihinalang sangkot sa ilegal na droga kabilang ang 22-anyos na estudyante ang nasakote sa buy-bust operation sa Malabon City.

Kinilala ni Malabon Police Chief P/Col. Jessie Tamayao ang mga naarestong suspek na sina Mark Joseph Ebarita, 24; Renzo Dalawangbayan, 22; Alexis Nankil, 26; Kenneth Ordonia, 24, at Bernardo Aquino, 38.

Sa imbestigasyon ni PSSg. Ramos Timmago, alas-6:10 ng umaga nang ikasa ang operasyon sa pangunguna ni P/Capt. Johnny Baltan, kasama ang PDEA-CAMANAVA kontra kina Ebarita at Dalawangbayan sa Maya-Maya St., Bgy. Longos.

Nang iabot ng mga suspek ang sachet ng shabu sa pulis na nagpanggap na buyer kapalit ng P500, sumugod agad ang back-up na mga operatiba at sinunggaban ang mga ito.

Nakumpiska sa mga suspek ang buy-bust money at walo pang sachets ng shabu habang kasama rin sa nadamba sina Nankil, Ordonia at Aquino matapos makuhanan ng tig-dalawang sachets ng hinihinalang shabu.