Spence, siniguro ang tsansa para makatapat si Pacman

Isang oportunidad ang bumukas sa pintuan ni bagong unified welterweight champion Errol Spence matapos ang pahirapang panalo nito laban kay Shawn Porter kahapon mula sa isang split decision victory sa Staples Center sa Los Angeles, California

Naisalba ng 29-anyos na kampeon ng International Boxing Federation (IBF) at bagong hirang na World Boxing Council (WBC) 147 lbs title ang panalo mula sa isang diretsong kaliwang suntok sa 11th round para mapabagsak ang 31-anyos na si Porter at makuha ang 116-111, 116-111 victory kina judges Steve Weisfeld ng New Jersey at Filipino-native Rey Danseco, samantalang pinaboran ni Larry Hazzard Jr. si Porter sa 115-112 sa isang madikdikang laro mula simula hanggang dulo.

Dahil sa panalo ni Spence, lumaki ang tsansa niyang makaharap si 8th-division World Champion at World Boxing Association (WBA) welterweight champ Manny “Pacman” Pacquiao para sa undisputed title at isang money-making fight dahil na rin sa iisang promotional outfit nitong Premiere Boxing Champions (PBC), gayunman, malaki pa rin ang pagnanais ng mga boxing fans na makatapat nito ang isa pang undefeated fighter na si WBO king Terrence Crawford.

“I’ve told my team, you line them up, I’ll knock them down,” pahayag ni Spence sa panayam ng ESPN.com hinggil sa reaksyon niya sakaling makatapat niya sina Pacquiao o Crawford.

Napanatiling malinis ang record ni Spence sa 26-0 na may 21 knockouts habang bumagsak sa 3 talo sa 30 panalo at 17KOs si Porter. “It feels good to win. This is a lifetime dream. It shows hard work pays off,” wika ni Spence sa pagsasama ng mga kampeonato nito.

Aminado si Porter at kanyang kampo na sinubukan talaga nilang gitgitin si Spence sa buong laro upang malaman ang katatagan nito sa laban bilang profighter, ngunit alam ni Porter na matindi ang pagkakasapol ng suntok ni Spence sa 11th round.

Samantala, binawi ni David Benavidez ang WBC super-middleweight title nang patumbahin si Anthony Dirrell sa 1:39 ng round 9 sa co-main event fight, habang ibinulsa ni Mario Barrios ang bakanteng WBA super lightweight title sa bisa ng unanimous decision laban kay Batyr Akmedov. Pinabagsak ni two-time world title challenger Josesito Lopez si John Molina Jr sa 8th round.