Nagpalaglag, hindi umepek, ayaw panagutan ng nakabuntis, gulung-gulo

Dear Roma, Ako si Joanne, 22, at may isang taong gulang na anak. Okay naman ang pagsasama namin ng ka-live in ko, pero nag-away kami dahil sa bisyo at pambababae niya. Napagkasunduan na naming maghiwalay pero susustentuhan niya ang anak namin. Pagkalipas ng ilang linggo, nakaramdam ako ng hilo at kinumpirma ng doktor na buntis ako. Hindi ko alam kung ano ang gagawin ko kaya sinubukan kong ipalaglag ang baby, pero nabigo ako dahil matindi ang kapit niya. Nu’ng sinabi ko sa ex ko na buntis ako, hindi siya naniwala. Roma, ano ang gagawin ko? — Joanne

Joanne, Hindi madali ang pinagdaraanan mo, pero dapat mong tandaan na ang pagkakaroon ng anak ay blessing dahil sila ay nabuo sa pagmamahalan ng dalawang tao. Maaaring ang pagiging makapit ng baby mo ang sign para bigyan siya ng karapatang mabuhay. Mahirap maging single- mom, lalo na kung dalawa ang palalakihin mo, pero wala man sa tabi nila ang kanilang ama, siguradong maraming tutulong sa iyo tulad ng iyong pamilya. Gayundin, kailangan mo itong kayanin para sa iyong mga anak. Kaya mo ‘yan, momshie. Good luck and God bless!