Ateneo, sweep sa 1st round; Red Warriors, nagpasuko

Ganap na winalis ng reigning back-to-back titlist Ateneo ang unang round ng UAAP Season 82 Men’s Basketball Tournament matapos igupo ang nakaraang taong losing finalist University of the Philippines 89-63 kahapon sa Araneta Coliseum.

Buhat sa dikdikang laban sa simula, unti-unting kumalas at lumayo ang Blue Eagles sa pagtutulungan nina Angelo Kouame, Thirdy Ravena, Matt Nieto, SJ Belangel at William Navarro tungo sa ika-7 sunod nilang panalo sa larong sinaksihan ng kabuuang 19, 681 katao.

Naapektuhan ng pagka-thrownout ni coach Bo Perasol may 6:23 pang nalalabi sa 3rd quarter ang laro ng Maroons matapos sugurin ang referee dahil sa isang non-call, lamang na noon ng double digit ang Ateneo, 47-35.

Dahil sa panalo na pinangunahan ni Kouame na tumapos na may 19 puntos, 15 rebounds at 7 blocks, humaba din hanggang 17 laro ang kanilang winning streak.

Nanatiling nasa 2nd spot ang Maroons na tumapos na may markang 5-2.

Samantala, sa unang laro, pinataob ng University of the East ang National University, 78-72.

Hindi nakalaro dahil sa injury sa nakaraang dalawa nilang laban, pinamunuan ni Philip Manalang ang 16-4 na simula ng Red Warriors na naidiretso nila sa panalo upang tumapos na may 2-5 na kartada.

Si Manalang din ang tumapos sa inilatag nilang 15-2 blast sa pagitan ng 3rd at 4th quarters na bumasag sa pagkakatabla ng iskor sa 45-all. Nakadikit pa ang NU sa pagtutulungan nina rookies Patrick Wilson Yu, Mike Malonzo at Migs Oczon, matapos ang itinalang 9-0 run. 68-69 sa loob ng huling apat na minuto sa oras.