3 timbog sa droga at sumpak

Kulong ang tatlo ka­tao kabilang ang isang bebot matapos makuhanan ng baril, mga bala at P20,000 halaga ng ilegal na droga sa Caloo­can City.

Kinilala ni Northern Police District (NPD) Dis­trict Special Operation Unit (DSOU) Head P/Major Ti­mothy Aniway, Jr., ang mga naarestong suspek na sina Alexander Pariñas, 38; Cri­zaldo Laude, 28, at Rochelle dela Cruz, 38, pawang mga residente ng Talakitok St., Bgy. 18, Libis Nadurata.

Sa imbestigasyon ni PCpl. Berzon Embile, alas-6:00 ng umaga, nagsasagawa ng surveillance operation ang mga operatiba ng DSOU kontra sa top most wanted person sa Talakitok St. nang mapansin si Pariñas na may nakasukbit na improvised shotgun o sumpak sa kan­yang tagiliran.

Inaresto ng mga pulis si Pariñas, kasama sina Laude at Dela Cruz kung saan na­kumpiska sa mga ito ang isang sumpak, anim na bala ng 12 gauge shotgun at pi­tong sachets ng pinaniniwa­laang shabu na nasa P20,000 ang halaga.