Gov’t. officials na nagpakulong kay De Lima, banned sa Tate

Inaprubahan ng United States Senate panel ang panukalang pagbabawal na makapasok ng Amerika ang mga opisyal ng gobyerno ng Pilipinas na sangkot sa pagkakakulong kay Senadora Leila de Lima.

Sa Twitter, inihayag ni U.S. Senator Richard Durbin na welcome siya sa pag-apruba ng Senate Appro­pria­­tions Committee na ami­­yen­dahan ang panukala ka­sama si Senator Patrick Leahy sa Fiscal Year 2020 State and Foreign Opera­tions Appro­pria­tions Bill.

Aniya, layon nitong pag­bawalan ang mga opisyal ng gobyerno ng Pilipinas na ma­patutunayang sangkot sa umano’y “politically moti­va­ted imprisonment” kay De Lima.

Iginiit pa nito na dapat nang palayain ang senadora.

Matatandaang, dati nang hinikayat ni Durbin ang pa­mahalaan ng Pilipinas na pa­layain na si De Lima sa pa­ma­magitan ng inilabas na re­solusyon kasama ang apat pang senador.

Samantala, kinastigo ng Malacañang ang ginawang pag-apruba ng U.S. Senate Com­mittee sa panukalang ito. Ayon kay Presidential Spokesman Salvador Pa­­nelo, ang naturang hakbang ay tahasang pangingialam sa domestic legal processes ng bansa.

Aniya, ginigipit nito ang independent institutions na katumbas na rin ng pangi­ngi­alam sa soberanya ng Pili­pinas. Giit pa ni Panelo, ang gi­nawa ng U.S. Committee ay isang insulto sa kapasidad ng mga awtoridad sa Pilipi­nas.

Pambabastos din umano ito sa inaasam na law and order ng mga Pilipino at tila tinatrato ang Pilipinas bilang mas mababa at hindi kuwali­pikadong rumesolba sa mga sariling isyu.

Gayunman, sinabi ng ka­lihim na walang gagawing kahit anong negatibong hak­bang ang Pilipinas para ma­bawi ang hatol ng panel dahil inirerespeto umano ng bansa ang democratic proces­ses sa Estados Unidos.

Muling iginiit ni Panelo na ang pagkakulong ni De Lima ay walang kinalaman sa pagiging kritiko nito kung saan dahil ito sa illegal drug related charges na kinakitaan ng probable cause base sa mga ipinrisintang ebiden­siya.

Sumasailalim din ito sa due process at tinatamasa rin ng senadora ang karapatan na maipagtanggol ang kan­yang sarili.