2 NPA, todas sa militar

Dalawang miyembro ng New People’s Army (NPA) ang patay sa panibagong engkuwentro sa pagitan ng militar sa Catanduanes, kahapon.

Ayon kay Army Lt. William Hiponia, nagsasagawa ng combat operation ang kanyang tauhan katuwang ang Provincial Mobile Force Company ng Catanduanes Provincial Police Office (CPPO) at Panganiban Municipal Police sa Bgy. Taopon nang makasagupa ng mga ito ang nasa pitong rebelde, bandang ala-1:00 ng madaling-araw.

Matapos ang sampung minutong bakbakan ay bumulagta ang dalawang hindi pa makilalang rebelde.

Umatras ang kalaban kung saan iniwan na ang napatay nilang kasamahan at maging ang ginamit na AR15 assault rifle at iba’t ibang mga bala sa encounter site.

Patuloy pa ang pagtugis ng militar at pulisya sa mga nagsitakas na kalaban na sinasabing patungo sa bundok na sakop ng katabing bayan.