Nangangalakal, nilikida ng riding-in-tandem

Sultan Kudarat—Isang nangangalakal ang pinagbabaril hanggang sa mapatay ng riding-in-tandem kamakalawa sa Bgy. Tinaungan, President Quirino.

Ang biktimang nagtamo ng tig-isang tama ng bala sa ulo at likod ay nakilalang si Alexander Manuel, residente ng Bgy. Tambak, Lambayong sa nasabing lalawigan.

Batay sa imbestigasyon, habang lulan ng kanyang pedicab si Manuel ay biglang sumulpot ang dalawang hindi kilalang suspek at agad pinagbabaril ang biktima.

Mabilis na tumakas ang mga suspek nang matiyak na patay na ang biktima.

Patuloy ang imbestigasyon ng mga awtoridad upang mabatid ang motibo ng mga suspek sa pamamaslang sa biktima at makilala ang pagkatao ng mga salarin.