SMB-Liaoning sa semis ng Terrific 12 ngayon

Makahaharap ng San Miguel Beermen ang Liaoning Flying Leopards mamayang gabi sa semifinals ng East Asia Super League Terrific 12 sa Tap Seac Stadium sa Macau.

Magsasagupa ang Beermen at Flying Leopards sa ganap na alas-7 ng gabi. Nakapasok ang Beermen sa semifinals ng Torneo makaraang talunin ang defending champion Ryukyu Golden Knights, 101-92, noong Huwebes sa pagtatapos ng preliminary round.

Pumutok si Dez Wells para sa Beermen pagkatapos umiskor ng 42 points para pangunahan ang koponan.

Nagpamalas din ng husay si Terrence Romeo matapos gumawa ng 18 points habang nagtala ng 15 points at 8 rebounds si Lester Prosper.

Mabigat ang kakaharapin ng Beermen sa semifinals sa kanilang laban kontra sa Flying Leopards na pinapangunahan ng mga dating NBA player na sina Lance Stephenson at Salah Mejri.

“First of all, it’s a great opportunity for our team especially the players who look up to Lance Stephenson when he was still playing in the NBA.

Everybody knows him,” saad ni San Miguel coach Leo Austria sa isang panayam ng PBA.ph.

Kilala si Stephenson sa kanyang mahigpit na paglalaro sa depensa. Minsang naglaro si Stephenson sa Indiana Pacers at sinamahan si LeBron James noong nakaraang season sa Los Angeles Lakers.

Dating naglaro si Mejri sa Dallas Mavericks at naglaro kamakailan para sa Tunisia sa FIBA Basketball World Cup.

Nakaharap ni Mejri ang Gilas Pilipinas sa nasabing torneo at tinalo nito ang pambansang koponan, 86-67.