Stomach Flu, nakakahawa!
Dear Doc. Shane, Ilang araw nang nagtatae at nagsusuka ang aking 4 years old na anak. Ang sabi sa amin, ito raw ay ilan sa mga sintomas ng stomach flu. Ano ang sakit na ito at ano ang dapat gawin para hindi ito lumala? — Irma
Sagot
Ang viral gastroenteritis ay madalas din tawaging “stomach flu”, pero wala itong kaugnayan sa flu o influenza. Ito ay iritasyon ng tiyan at bituka dahil sa impeksiyong sanhi ng mikrobyo. Karamihan sa mga bata na may viral gastroenteritis ay nawawala rin pagkalipas ng ilang araw nang walang paggamot, pero siyang bantayan dahil ang sakit na ito ay nanganganib sa dehydration.
Narito ang ilan sa mga sintomas ng viral gastroenteritis:
Pagtatae (malambot at basang dumi)
Pagkahilo
Pagsusuka
Pananakit ng tiyan
Lagnat
Panunuyo ng labi
Pananakit ng ulo
Nakahahawa ba ang viral gastroenteritis?
Ito ay nakahahawa dahil ang mga mikrobyo na sanhi ng impeksiyon ay madalas na nagpapasalin-salin. Maaaring makuha ang mikrobyo mula sa pagkain, kagamitan sa pagkain at mga laruan.
Narito ang ilan sa mga maaaring gawin upang hindi ito lumala:
Tiyaking mayroong sapat na pahinga
Uminom ng maraming tubig o sabaw
Maaari ring uminom ng oral rehydration tulad ng pedialyte o oresol
Iwasan ang mga inuming matatamis o maraming asukal tulad ng softdrinks o juice
Kumain ng masusustansiyang pagkain tulad ng gulay at prutas
Ugaliing maghugas ng mga kamay
Panatilihing malinis ang lugar kung saan naghahanda ng pagkain
Iwasang lumapit sa mga taong may ubo at sipon.
Comments