Isinanlang baril binusisi, nakalabit.. Bebot, sapol sa tiyan

Sugatan ang isang babae matapos pumutok ang baril na isinanla sa kanila at tamaan siya sa tiyan sa Pasig City, kamakalawa.

Ginagamot sa Pasig City General Hospital (PCGH) ang biktimang si Fe Lagartos, 30, residente ng Bgy. Manggahan.

Ayon sa Pasig City Police, alas-3:20 ng hapon kamakalawa nang maganap ang insidente sa loob ng bahay ng biktima.

Kauuwi lamang umano ni Panlilo Garcia, live-in partner ng biktima nang madatnan niyang sugatan ang kinakasama kaya dinala ito sa pagamutan.

Ayon umano sa biktima, binubusisi lamang niya ang hindi pa tinukoy na kalibre ng baril.

Gayunman, aksidente nitong nakalabit ang gatilyo at tinamaan siya sa tiyan.

Sa imbestigasyon ng pulisya, nabatid na isang alyas Amy Tomboy ang may-ari ng baril at isinanla lamang ito kay Garcia nang mangailangan ng pera.