Tuwing rush hour sa EDSA.. Pribadong sasakyan, bawal

Inirerekomenda ng isang kon­gresista na ma­ipagbawal na sa EDSA ang pagbiyahe ng mga pribadong sasakyan kung rush hour.

Sa harap na rin ito ng inaasahang pagsisikip pa ng daloy ng trapiko sa papa­lapit na Christmas Season.

Ayon kay Caloocan City 2nd District Rep. Edgar Erice, vice-chairman ng House Committee on Met­ro­politan Development, na mula alas-6:00 hanggang alas-9:00 ng umaga at mula alas-6:00 hanggang alas-9:00 ng gabi ay dapat ipagbawal ang private vehicles.

Ibig sabihin, mga pam­pub­likong sasakyan o mass transport lang ang bibiyahe sa mga oras na ito sa EDSA na tatawaging “mass trans­port highway”.

Tinukoy ng kongresista na nasa tinatayang 300,000 ang pribadong sasakyan na bumibiyahe sa EDSA, araw-araw. Mas marami ito sa 8,000 bus sa EDSA.

Idinagdag pa ni Erice na maaari namang pag-aralan kung mapapayagan ang mga motorsiklo at ride-hailing firm tulad ng Grab na bumi­yahe sa EDSA kahit rush hour.

Gayunman, paglilinaw ni Erice, pansamantala at madaliang solusyon lamang ito habang hinihintay na ma­tapos ang mga itinatayong imprastruktura at pagsa­sa­ayos ng railway system sa Metro Manila.

Nabatid sa Metropolitan Manila Development Au­tho­rity (MMDA) na uma­bot na sa 405,882 ang ave­rage na bilang ng mga sasak­yan sa EDSAmula noong Enero hanggang Agosto ng kasalukuyang taon. Mas mataas sa 383,828 na mga sasakyan noong 2018.