Titulo ng lupa, hindi puwedeng malipat sa nakabili hangga't may utang sa amilyar

Dr. Persida V. Rueda-Acosta / Magtanong Kay Attorney

Dear Chief Acosta,

Mayroon akong nabiling lupa, pero ang titulo ay nasa pangalan pa ng dating may-ari. Nais ko na itong ilipat sa aking pangalan, pero tumatanggi ang Register of Deeds dahil hindi raw ako nakapagbayad ng amilyar nang dalawang taon. Tama ba ito? — Susan

Dear Susan,

Para sa inyong kaalaman, nakasaad sa Section 12 ng Presidential Decree (PD) No. 464 o mas kilala bilang”Real Property Tax Code”:

“Section 12. Duty of Register of Deeds to Apprise Assessor of Real Property Listed in Registry.

x x x

It shall also be the duty of the Register of Deeds to require every person who shall present for registration a document of transfer, alienation or encumbrance of real property to accompany the same with a certificate to the effect that the real property subject of the transfer, alienation or encumbrance, as the case may be, has been fully paid of all real property taxes due thereon. Failure to provide such certificate shall be a valid cause for the Register of Deeds to refuse the registration of the document” (Binigyang-diin).

Sang-ayon sa nabanggit na probisyon, sa pagpaparehistro ng real property, kinakailangang ang lahat ng real property tax sa lupa ay bayad. Sa inyong sitwasyon, ang pagtanggi ng Register of Deeds na irehistro ang inyong lupa sa inyong pangalan dahil mayroon pa kayong nararapat bayarang amilyar ay naaayon sa batas. Upang inyong maiparehistro ang inyong lupa, kinakailangan muna ninyong bayaran ang dalawang taong amilyar at ipresenta ang certificate na bayad na ito sa Register of Deeds.

Nawa ay nasagot namin ang inyong mga katanungan. Nais na­ming ipaalala sa inyo na ang opinyong ito ay nakabase sa inyong mga naisa­laysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.