Naka-1 gold, 1 silver ang PHL Dragon boat sa China

Sinagwan ng Philippine Canoe-Kayak Dragon Boat Federation (PCKDF) ang tig-isang ginto at pilak na medalya sa nakalipas na 2019 Haihe River International Dragon Boat Championships nitong Setyembre 11-15 sa Tianjin, China.

Napanalunan ng Pinoy paddlers ang ginto sa 200m Men’s small boat at silver sa 500m men’s small boat na magsisilbing preparasyon para sa nalalapit na pagbubukas ng 30th edisyon ng Southeast Asian Games na magsisimula sa Nob. 30-Dis. 11 sa iba’t ibang lugar sa Luzon.

Binubuo ang pambansang koponan nina Archie Baylosis, Christian Burgos, Norwell Cajes, Edmund Catapang, John Lester Delos Santos, Alex Generalao, Hermie Macaranas, Diomedes Manalo, Reymart Nevado, Daniel Ortega, Robert Pantaleon, John James Pelagio, Jonathan Ruz, John Paul Selencio at Jerome Solis. “This event will serve us an additional morale boost coming SEA Games. We’re glad that they invited us to participate in this high-level international event and we’re very grateful to the PSC for the support,” pahayag ni PCKDF head coach Leonora Escollante.

Naging kakaiba ang International Dragon Boat race dahil ginawa ito ng mga organizers na Tianjin Dragon Boat Association sa kauna-unahang pagkakataon sa gabi sa Haihe River kung saan napalilibutan ng maliliwanag na ilaw para maging gabay ng mga kalahok at tanglaw ng mga manonood habang nag-uunahan sa rutang Silk Road Economic Belt hanggang 21st Century Maritime Silk Road (belt & road).

Mahigit sa 20 bansa ang lumahok sa pandaigdigang karera kabilang ang Russia, Spain, Japan, Indonesia, United Arab Emirates, Pilipinas at Australia, gayundin ang ilang Chinese cities at rehiyong bumuo ng 26 koponan na may halos 500 atleta ang sumagwan sa kompetisyon.