Misis na zero ang sex life, tamang dudang may kabit ang mister
Salaminin natin ang panaginip ni Frances ng Cesca_Ellia@facebook.com
Dear Professor,
Dalawang beses na akong nananaginip na may ibang karelasyon ang asawa ko at may nangyayari raw sa kanila. Tapos nu’ng nakaraan, napanaginipan ko na katrabaho raw niya ‘yung karelasyon niya. Ano ang ibig sabihin nito?
Naghihintay,
Frances
Sa iyo, Frances,
Ilan taon na ba kayong nagsasama ng asawa mo? Siguro, humigit-kumulang pitong taon na kayong mag-asawa.
Alam mo, kapag ang buhay-may asawa ay umabot ng pitong taon, ang isa sa mag-asawa ay maaaring makaranas ng “seven-year itch of marriage”.
Sa panahong ito, ang selos ay nasa pinakamataas na antas, ‘yung tipong ang mga naiipong pagkakamali, pagkukulang at mga kasalanan ay parang sakit na umaatake kung saan ang mga ito ay hindi nakagugulo sa buhay ng mag-asawa.
Minsan, ang numerong seven ay puwedeng maging apat o limang taon o mas maaga kung ang mga pagkakamali at pagkukulang ay sumagad na. Ito ang tunay na dahilan kung bakit maraming marriage life ang nagwawakas.
Pero alam mo, iha, gaanuman katindi ang selos, ito ay bahagi ng buhay-mag-asawa. Kaya ang pagkakamali, pagkukulang at kasalanan ay ganundin.
Nagseselos ka, ‘di ba? Ibig sabihin, mahal mo ang iyong asawa. Dahil dito, bilang pagtatapat sa iyo, hindi puwedeng mapabilang ka sa mga babaeng sira ang marriage life at kung may anak kayo, siya ay mapapabilang sa mga may broken-family. Dahil dito, huwag mong hayaang mawasak ang inyong pagsasama dahil sa selos.
Ano pa ang mga katotohanan sa likod ng iyong panaginip?
Kulang ang inyong paglalambingan o romance.
Kulang din ang intimate time ninyo para iparamdam sa isa’t isa ang inyong pagmamahalan.
Almost zero ang sex life mo.
Ang sobra naman sa iyo ay ang pagtitiis mo sa mga pagkukulang ng iyong mister.
Ang mga ito ay hindi sapat para mag-iba ang marriage life dahil may mga paraan para muling maibalik ang tamis ng pag-ibig. Huwag kang matakot! Ayon sa panaginip, mahal ka ng asawa mo at alam niyang hindi puwedeng masira ang kanyang marriage life.
Hanggang sa muli,
Professor Seigusmundo del Mundo
Comments