Lider ng mga pasaway na kabataan, wanted.. Pulis, pinasok sa BGY. hall, binaril

Sugatan ang isang pulis matapos pasukin at barilin ng umano’y lider ng grupo ng mga kabataang pa­saway sa loob ng barangay hall sa Navotas City, Biyer­nes ng gabi.

Ayon kay Navotas Po­lice Chief P/Col. Rolando Balasabas, ginagamot si P/Cpl. Mark Jhon Abiva, 31, sa Tondo Medical Center sanhi ng tama ng bala sa ka­liwang balikat at kanang kamay.

Pinaghahanap naman ang suspek na si alyas Ian, 17, ng Bgy. Sipac Almacen.

Sa imbestigasyon ni PCpl. Filbert Madio, alas-11:20 ng gabi, naka-duty ang biktima, kasama si PCpl. Christopher Binuhe bilang “Pulis sa Barangay” sa loob ng barangay hall ng Sipac Almacen nang biglang pu­masok ang suspek na arma­do ng baril at pinaputukan ang pulis bago tumakas.

Hinabol ito nina PCpl. Abiva at Cpl. Binuhe suba­lit, nang mapansin ng huli na duguan ang kabaro ay hu­mingi ito ng tulong sa baran­gay tanod na nagdala sa bik­tima sa naturang paga­mutan.

Ani Col. Balasabas, ang suspek ay sangkot sa maliliit na krimen at palagi ring na­huhuli sa paglabag sa ordi­nansa ng lungsod.

Isa sa mga miyembro ng pasaway na kabataan ang kinasuhan ng alarm and scan­dal matapos madakip ni Cpl. Abiva.

Naniniwala naman ang pulisya na ang tangkang pag­patay kay PCpl. Abiva ay ganti ng suspek sa mga pulis na patuloy ang operasyon kontra sa mga pasaway na ka­bataan sa naturang lugar.