Mas mababang singil sa kuryente, kasado na
INANUNSIYO ng Meralco ang matagumpay na bidding para sa contract capacity na 1,200 MW (NET) na magsu-supply sa Meralco, epektibo sa Disyembre 26, 2019 para sa 10 taong termino.
Ang hakbang ay ginawa dahil sa circular ng Department of Energy (DOE) na nagtatakda na bumili ng kuryente sa pamamagitan ng Competitive Selection Process (CSP).
Ang CSP ay pinangangasiwaan ng Third Party Bids and Awards Committee (TPBAC) na ginawa dahil sa naturang circular.
Ipinaaalam din ng distribution utility sa pubiko na matapos ang pagbubukas at evaluation sa Bids, idineklara ng TPBAC na ang bidding na isinumite ng PHINMA Energy Corporation, San Miguel Energy Corporation at South Premiere Power Corporation ang siyang ‘Best Bids”.
Ginawa ng TPBAC ang findings base sa non-discretionary “Pass/Fail” assessment matapos madetermina na walang failure of bidding.
Base sa instructions ng Prospective Bidders, ang nangunguna sa bidding ay sasailalim sa post-qualification.
Ang Third Party Bids and Awards Committee ay inaasahang mag-iisyu ng notices of awards na pabor sa mga pumasa sa post qualification kahapon at susundan ito ng pirmahan ng Power Supply Agreement sa Meralco ngayong linggo.
Idineklara naman ng Meralco na ang matagumpay na CSP ay magreresulta sa mas mababang gastos sa mga consumer dahil ang all-in rate ay kasama na ang line rental at VAT, gayundin ang gastos sa replacement power sa lahat ng plant outrages.
Ang generator companies din ang mananagot sa pagpapabayad ng multa kapag hindi sila nakapag-deliver ng kuryente na gagamitin para mabawasan ang generation cost ng mga consumer.
Ayon pa sa Meralco, ang resulta ng presyo mula sa CSP ay mas mababa sa kanilang average generation cost ngayon na umaabot sa P5.88 per kWh (VAT inclusive) at kapag naipatupad na ito simula sa Disyembre 26, inaasahan ang mga consumer ng Meralco ay makatitipid ng P0.28 per kWh o 9.46 bilyon kada taon sa loob ng 10 taon mula sa bagong Power Supply Agreements na pangangasiwaan ng nanalong power suppliers. (BRT)
Comments