‘Wag na raw ipilit na tanggapin sila.. Mother Ricky sa LGBT: itigil na ang kaartehan!

Malinaw ang paninindigan ng sikat na celebrity at hair salon magnate na si Ricky Reyes, na mas kilala bilang si Mother Ricky, tungkol sa isyu ng paggamit ng comfort room ng mga LGBTQ members, gayun din sa usapin ng SOGIE Bill.

Nakausap namin si Mother Ricky sa kanyang Child Haus Building sa Escoda St., Manila na malapit sa Philippine General Hospital.

“This year, lahat ng LGBT, nilikom ko silang lahat. Sabi ko, tigilan ninyo ang kabaklaan. Huwag na kayong mag-bestida sa kalye kasi lalo lang tayong pagtatawanan ng tao. Okey,” panimula ni Mother Ricky.

Dapat daw tumulong ang mga gay na gaya niya sa kapwa para raw mahalin sila ng mga tao.

“At lagi kong sinasabi, ang bakla, walang ibang ma­kakaintindi kundi bakla lang talaga. Kahit sarili nilang nanay, kahit sarili nilang tatay, sasabihin, ‘Ah, mahal ka namin, anak, naiintindihan ka namin.’ Sh*t!

“Mahuli ka ng tatay mo na kumokokak ka, sipain ka pa ng tatay mo, ‘Day! ‘Di ba?

“Pero ang bakla, mahuli ka ng bakla na kumo­kokak ka, ‘Hoy, bakla, share ako, ha? Akin na ang number.’ ‘Di ba?

“Nagkakaintindihan. Walang makakaintindi sa bakla kundi bakla lang,” dagdag pa nito.

Payo pa ni Mother Ricky, ang affair ng mga bakla, dapat sa kanila lang at huwag nang ipa­ngalandakan sa tao.

“Bakit kailangan kong ipanga­landakan sa madlang pipol? ‘Uy, intindihin mo nga ako, bakla ako.’ Teka muna.”

Bilang iconic gay sa ‘Pinas, klaro ang stand ni Mother Ricky sa kon­trobersiyal na comfort room for gays.

“Kung ikaw ay may nota, sa lalaki ka. ‘Pag may kipay ka, sa babae ka. Finish! ‘Yun lang ‘yun. Inirerespeto kita bilang tao. Inirerespeto kita bilang bading. Pero lumugar tayo sa tamang lugar, ‘di ba?

“Kung ikaw, babaeng-babae at hindi na mabubuking, eh, di lumusot ka kung makakalusot ka. Pero kung hindi ka makakalusot, ano’ng problema mo?”

Gaya ni Jake Zyrus na kahit isang lesbian ay sa CR pa rin ng mga babae pumapasok.

“Yeah, ‘di ba? Kung may kipay ka, girl ka. Kung may nota ka, hombre ka. Ganoon lang.

“Kung nagpaopera ka, kaso nga ang bakla, kahit operada na, kahit may kipay na, maski may boobs na, bakla pa rin ang utak, ‘Day. Saan ka nakakita, ‘Oy, may kipay na ako, oh.’ ‘Uy, may boobs na ako.’ May babae bang ganu’n? Wala namang babaeng ganyan, ‘di ba?

“Diyos ko! Lumugar lang sa tamang lugar, ‘di ba? Doon lang tayo, kasi meron naman tayong gay community. Bakit natin kailangan ng kung anu-ano, eh, may gay pageant naman tayo?

“Bakit tayo pupunta sa mga lugar na ipagpipilitan mo na girl ka, eh, may bar naman para sa mga bading, ‘di ba?

“Doon ka sa lugar natin. Bakit kailangan mong maki­pagsaksakan sa lugar na hindi ka naman mata­tang­gap?” tuluy-tuloy na paliwanag niya.

Kinuha rin ang opinyon ni Mother Ricky kung sa palagay ba niya ay nae-exaggerate lang ang usapin sa CR for the LGBTQ na umabot pa sa Congress.

“Let it be na lang. Basta ang bakla, eh, bakla, maski ano ang gawin niyan. Isulat n’yo ‘yan, ang bakla ay bakla. Ang bakla, gilingin ko man ‘yan, ang labas niyan, baklang hamburger.”

Nagpahayag din ng saloobin si Mother Ricky tungkol sa isinusulong na SOGIE Bill sa Senado.

“Ang kasal ay para lamang sa babae at lalaki. Eh, merong kasabihan sa Catholicism na sacrilege. Pambabastos sa relihiyon, huwag na.

“Ang pagpapakasal ay ibigay na natin sa babae at lalaki, ‘di ba? Saka, kung gusto ninyo ng union, eh, di mag-union kayo.

“Bakit ako, I’m in a relationship for 40 plus years, but we never go out of our way? ‘Ay, kailangan naming magpakasal.’ No more.

“May kasabihan tayo, you never, never rock the boat if it is not broken. ‘Pag maayos siya, go lang, ‘di ba? So, bakit kailangang ipagsaksakan kung ‘di naman magulo? Eh, pinagugulo mo lang ang mundo, ‘di ba?”

Umiling naman si Mother Ricky when we asked him kung napag-usapan din ba nila ng partner niya na si Daddy Cris Aquino ang magpakasal.

“Never,” diin niya.

“We have children. We have grown-ups children. And they are good children. But we never talk about marriage, never. Sabi nga, you never rock the boat if it is not broken.”

‘Yun na.