Amit, 2nd place, China, champ sa World 9-ball

HINDI pinayagan nina Anthony Cortes Raga at Rubilen Amit na walang kinatawan sa podium ang Pilipinas nang pareho ni­lang nahablot ang brides­maid honors sa men’s at women’s bracket ayon sa pagkakasunod-sunod nang malupit na 2019 World 9-Ball China Open sa Pudong Tangzhen Cul­ture and Sports Center ng Shanghai, China.

Hindi maituturing na tsamba ang naging laro ni Raga at hindi rin mahina ang mga karibal dahil ka­sama sa mga ginawang tuntungan ng Pinoy ay ang mga panalo kontra sa mga bigating personalidad ng global billiards para ma­kuha ang karangalan.

Ang listahan ay kinabi­bilangan nina Albanian World Pool Billiards As­sociation (WPA) no. 16 Eklent Kaci (11-8), Chi­nese Fu Jianbo (11-5), WPA no. 17 at kapwa Pi­noy Johann Chua (11-9), WPA no. 2 Niels Feijen ng Netherlands (11-8), WPA no. 8 at Scotland gem Jayson Shaw (9-7) at si Puerto Rican Enrique Rojas (9-8).

Bukod dito, hindi see­ded sa main draw si Raga, wala sa WPA elite list pero pang-30 sa Fargo Ratings, at kinailangan pa niyang dumaan sa qualifying rounds kung saan sinaga­saan niya sina Shen Shenyi (China, 9-2), Thorsten Hohmann (Germany, 9-4) at Xu Xiacong (China, 9-1).

Noong championship round, napuwersa ng Ce­buano si Fargo listing top rated Wu Jiaqing sa isang hill-hill na bakbakan bago ito kinapos (10-11) kaya nakuha ng pambato ng punong-abalang China ang korona at ang gan­timpalang USD 40,000.

Sa kabuuan, siyam na panalo at dalawang talo ang naging rekord niya sa torneo.

Sa kabilang dako, hindi kinaya ni Amit ang open­sa ng pinakamalupit na lady cue artist sa buong mundo na si Chen Siming ng Chi­na sa finals, 3-9, kaya nag­kasya ito sa pangalawang puwesto.

Tinapos ng isa pang Cebu pride ang paligsa­han na may bitbit na anim na panalo at dalawang talo.