Tracksters, inspirado sa new Clark Sports Complex

TIYAK na mas lalo pang determinado at inspirado ang mga pambansang atleta dahil sa lubos na naibibigay na suporta ng gobyernong pampalakasan partikular na ang kahandaaan sa nalalapit na 30th Southeast Asian Games sa bansa.

Aminado ang mga opisyales ng Philippine Athletics Track and Field Association (PATAFA) Inc. na mas magagampanan ng husto ng mga national tracksters ang kanilang adhikain na mas lalo pang pagbutihin ang kampanya sa biennial meet dahil sa pagkakaroon ng dekalibreng track oval sa bagong gawang track and field stadium sa New Clark City sports complex.

Maipagmamalaki umano sa buong mundo ang state-of-the-art na stadium sa pagkakaroon nito ng mga bagong kagamitang angkop sa paghahanda at pag-eensayo ng mga Filipino runners sa paparating na biennial meet na magbubukas simula Nobyembre 30 hanggang Disyembre 11 sa NCC sports complex sa Capas, Tarlac.

Isa sa mga tinukoy ng dating Philippine Sports Commission (PSC) chairman Philip Juico hinggil sa track stadium ay ang pagkakaroon umano nito ng 3-lane indoor 80-meter warmed up area na maaaring magamit ng mga atleta bago sumabak sa kompetisyon, na naikumpara pa niya sa 80-year-old na Rizal Memorial Stadium.

“Iyong sa Rizal Memorial warmed up area eh sa tennis court lang o semento sa labas, but this time we have an IAAF certified warmed up oval,” sambit ng De La Salle University graduate.