Adamson at UST, matatag sa PVL

PINATIBAY ng Adamson University ang pamumuno sa Pool A matapos iposte ang ika-4 na sunod nilang panalo sa pamamagitan ng 14-25, 25-21, 25-15, 25-21 paggapi sa Ateneo de Manila kahapon sa 2019 PVL Collegiate Conference sa FilOil Flying V Center.

Pagkaraang matalo sa first frame, sumandig ang Lady Falcons kina Trisha Genesis, Louie Romero at Lucille Almonte upang makabawi sa second set. “Parang blanko lahat noong first set. So ginawa namin kinalma muna namin,” ani Adamson coach Lerma Giron. “Sabi namin reset tayo ng second set, erase na natin yung first set. Let’s start fresh. So, nag-respond naman yung mga bata na-challenge sila.”

Tila hihirit pa sana ng 5th set ang Lady Eagles nang makalamang sa iskor na 16-13 sa pangunguna ni Ponggay Gaston. Pero muling naipatas ang iskor ng Adamson sa 21-all at doon na nag-takeover sina Genesis at Almonte upang tiyakin ang tagumpay ng Lady Falcons. Umiskor si Genesis ng game-high 19 puntos,12 dito ay mula sa service aces bukod pa sa 9 na excellent receptions habang tumapos si Almonte na may 14 puntos, 15 digs at 11 excellent receptions at nagdagdag si Romero ng 28 excellent sets at 4 na puntos para sa Lady Falcons. Nanguna para sa Ateneo si Erika Raagas na may 16 puntos.

Sa iba pang laban, tumatag sa ibabaw ng Pool B ang UST pagkaraang pataubin ang FEU 25-14, 25-17, 10-25, 23-25, 15-12. (VA)