P80 milyong shabu, natagpuan sa tumaob na speedboat

NAGULANTANG ang mga awtoridad sa pag­kakadiskubre sa may 10 kilong high grade shabu mula sa tumaob na speedboat sa karagatang sakop ng Zam­bales, kamakalawa ng umaga.

Wala ng crew o tauhan nang marekober ang nasa­bing speedboat habang nasa tabi nito ang dalawang kulay asul na plastic drum na palutang-lutang malapit sa dalam­pa­sigan ng Bgy. Loc-loc, Pa­lauig.

Ayon sa report ng Palauig Municipal Police Station, na­katanggap umano sila ng tawag mula sa ilang residente sa lugar kaugnay sa pagka­katagpo sa nabanggit bangka.

Sinasabing una nang ina­bandona ng crew ang bangka at maging ang karga nito ma­daling-araw pa la­mang ng Biyernes.

Kasama ng Palauig Police ang ilang tauhan ng PNP Maritime Unit at Philippine Coast Guard (PCG) ay tinu­ngo ang lugar kung saan bu­mulaga ang bultu-bultong shabu na nakapaloob sa dalawang malaking plastic drums. Tinatayang nasa P80 milyon ang halaga ng nasabat na droga.

Pormal nang nai-turn­over ang kontrabando sa pa­ngangalaga ng Zambales Philippine Drug Enforce­ment Agency (PDEA).

Patuloy naman ang pag­sisiyasat kung saan nagmula ang speedboat ka­sabay na rin sa pagtukoy kung sino ang may-ari nito.