Kaugnay ng Inopacan massacre, utos ng korte.. Joma Sison, misis at 36 iba pa, arestuhin

INIUTOS ng Manila Regional Trial Court ang pag-aresto kay Communist Party of the Philippines (CPP) Chairman Jose Maria Sison, kanyang misis at 36 iba pa kaugnay sa kasong multiple murder na isinampa laban sa kanila mahigit nang isang dekada.

Inisyu ang warrant of arrest ni Judge Thelma Bunyi-Medina ng Branch 32 laban kay Sison noong Agosto 28, kaugnay sa kasong isinampa noong 2006 matapos madiskubre ang isang mass grave sa Inopacan, Leyte na pinaglagyan umano ng mga pinaslang ng mga miyembro ng NPA noong 1980.

Wala namang inirekomendang piyansa para sa pansamantalang kalayaan ng mga akusado.

Bukod kay Sison na nasa exile sa The Netherlands, inutos din ang pag-aresto dahil sa 15 counts ng murder sina Rodolfo Salas alyas Ka Bilog, Leo Velasco, Jose Luneta, Geronimo Pasetes, Prudencio Calubid at Luis Jalandoni, mga senior adviser ng CPP- National Democratic Front of the Philippines. Akusado rin sa nabanggit na kaso sina dating Bayan Muna Congressman Satur Ocampo at NDF Consultant Vicente Ladlad at Kilusang Magbubukid ng Pilipinas deputy Secretary-General Randall Echanis pero, sila ay out on bail. Si Sison at iba pang akusado ay responsable umano sa ‘Inopacan massacre’.

Isinampa ang kasong murder matapos mahukay ang 67 kalansay ng kanilang mga biktima sa Subang Daku Village sa Inopacan, Leyte noong 2006.