Pulis binentahan.. Mag-live-in partner kulong sa shabu

TIKLO ang mag-live-in partner na kapwa umano tulak ng iligal na droga matapos magbenta ng shabu sa pulis sa buy-bust operation sa Malabon City, kahapon ng madaling-araw.

Kinilala ni Malabon Police Chief P/Col. Jessie Tamayao ang mga naarestong suspek na sina Carlito Gueco alyas Lito, 50, at Eloisa Tolores, 48, kapwa ng Sangandaan, Caloocan City.

Ayon kay Col. Tamayao, ala-1:30 ng madaling-araw nang ikasa ng mga operatiba ng Station Drug Enforcement Team sa pangunguna ni P/Capt. Johnny Baltan at CAMANAVA-PDEA ang buy-bust operation kontra sa mga suspek sa Pacencia St., Bgy. Tugatog.

Nakaiskor sa mga suspek ng isang sachet ng shabu ang undercover police na nagpanggap na poseur-buyer at nang magkaabutan, agad sinunggaban ang mag-live-in partner.

Ani SDEU Investigator PSSg. Jerry Basungit, nakumpiska sa mga suspek ang 32 sachets na naglalaman ng hindi pa matukoy na halaga ng hinihinalang shabu.