Motor, huli sa aktong ‘kinakatay’ | sk kagawad at estudyante, timbog

KALABOSO ang 20-anyos na SK kagawad at kanyang kasama matapos maaktuhang kinakatay ang isa umanong nakaw na mo­torsiklo sa Caloocan City, kamakalawa ng gabi.

Kinilala ang mga sus­pek na sina Jerwin Ocampo, SK Kagawad ng Bgy. 7, at Joe­mel Marin, 20, estudyante, ng Bgy. 10.

Sa nakarating na report kay Caloocan Police Chief P/Col. Noel Flores, bandang alas-11:00 ng gabi noong Lunes, ipinarada ni Jason Denz Asistio, 27, corporate secretary, ang kanyang Ya­maha Mio motorcycle (6221QX) sa harap ng kanilang bahay sa 9th Ave., Bgy. 59.

Alas-4:00 ng Martes ng madaling-araw, gagamitin ni Asistio ang kanyang mo­torsiklo para bumili ng pan­desal ay nagulat ito dahil wala na ang motor na naging dahilan upang i-report sa PCP-2 at sa Anti-Carnap­ping Unit.

Alas-5:20 ng hapon, nakatanggap ng tip ang mga pulis mula sa kanilang im­pormante hinggil sa isang motorsiklo na tumutugma sa paglalarawan ng nawawalang motorsiklo na kinakatay ng dalawang lalaki sa Velasco St., Bgy. 7.

Pinuntahan ng mga pulis ang naturang lugar sa pa­ngunguna ni P/Capt. Jona­than Olveña na nagresulta sa pagkakaaresto sa mga suspek.