Mga magsasaka, pasok sa 4Ps

DAPAT na rin umanong ipasaklaw sa mabibigyan ng benepisyo ng Conditional Cash Transfer Program ang mga magsasaka na matin­ding nalulugi ngayon sa pag­baha ng imported at smuggled rice kasabay sa pag-iral ng Rice Tariffication Law.

Ayon kay House De­puty Speaker Basilan Rep. Mujiv Hataman, nanganga­ila­ngan ng karagdagang ayuda ang mga magsasaka mula sa gobyerno.

Bukod pa ito sa tulong na dapat maibigay sa mga magsasaka mula sa Rice Competitiveness Enhance­ment Fund (RCEF) ng De­partment of Agriculture (DA).

Paliwanag ni Hataman, ang tulong mula sa DA ay layong maging produktibo pa ang mga magsasaka ha­bang ang ayuda ng DSWD ay pagtawid sa krisis.

Sa briefing ng DA sa House Committee on Agri­cul­ture and Food, sinabi ni DA Undersecretary Ariel Ca­yanan na sa 4th quarter pa ng 2019 mararamdaman ng mga lokal na magsasaka ang pakinabang ng RCEF.

Isinasaayos na rin aniya ang pagkakaloob ng credit assistance na P15,000 na wa­lang ipapataw na interest at maaaring bayaran sa loob ng walong taon na pakikina­ba­ngan muna ng mga pinaka-apektadong rice farmers, de­pende sa lawak ng ektaryang sinasaka at sa naiaambag na produksiyon.