6 kulong sa baril at shabu

ANIM na hinihinalang sangkot sa iligal na droga ang arestado sa buy-bust operation sa magkahiwalay na lugar sa Caloocan City.

Ayon kay Caloocan Police Chief P/Col. Noel Flores, alas-2:00 kamakalawa ng hapon nang ikasa ng mga operatiba ng SDEU at PCP-3 sa pangunguna ni P/Maj. Jhobie Astucia ang buy-bust operation kontra kay Jayson David alyas Kalbo, 29, sa Bgy. 176, Bagong Silang.

Matapos iabot ni Kalbo ang sachet ng shabu sa undercover police kapalit ng P500 marked money ay agad itong dinakma, kasama sina Joey Llahto, 37, user; Levy Salvatierra, 28, user, at Don Laurence Villanueva, 23, pusher.

Narekober kay Kalbo ang buy-bust money, dalawang sachets ng shabu at dalawang ziplock na naglalaman ng pinatuyong dahon ng hinihinalang marijuana habang nakuha sa iba pang suspek ang apat na sachets ng hinihinalang shabu.

Alas-4:00 naman ng hapon nang maaktuhan ng mga pulis sina Dandy Borromeo alyas Alamat at Regie Soriano na nagsa-shabu sa loob ng isang bahay sa Bgy. 176, Bagong Silang.

Nakumpiska ang dalawang selyadong sachet ng shabu, isang nakabukas na sachet ng shabu, ilang drug paraphernalias na may bahid ng shabu at isang magnum .22 at limang bala nito.