Akyat-bahay utas sa parak

PATAY ang hinihinalang kawatan matapos makipag­barilan sa mga pulis matapos silang maaktuhan na nagta­tangkang pumasok sa isang bahay sa Marikina City, ka­hapon ng madaling- araw.

Hindi pa tukoy ng mga awtoridad ang pagkaka­ki­lanlan ng napatay na suspek at ang nakatakas nitong ka­samahan.

Sa ulat ng Marikina City Police, alas-2:15 ng mada­ling-araw nang maganap ang engkuwentro sa Falcon St., Bgy. San Roque.

Batay sa imbestigasyon, kasalukuyan umanong nag­sasagawa ng surveillance operation sa lugar ang mga pulis sa pamumuno ni P/Capt. Jervies Soriano, nang maispatan ang dalawang suspek na nagtatangkang pumasok sa isang bahay.

Agad na nilapitan at sinita ng mga pulis ang mga sus­pek.

Gayunman, sa halip na sumuko ay agad bumunot ng baril ang mga suspek at nag­pa­putok sa direksiyon ng mga awtoridad.

Napilitang gumanti ng mga pulis at napuruhan ang isa sa mga suspek habang na­katakas ang isa pa.

Narekober ng mga aw­toridad mula sa suspek ang kalibre .38 revolver na may apat na bala, isang itim na sling bag na may folding knife at cellphone.