Mga sintomas ng prostate enlargement

SHANE M. LUDOVICE, M.D / SABI NI DOC

Dear Doc. Shane,

Ako ay 59 yrs. old at nalaman ko sa kum­pare ko na prob­lema ng mga mata­tandang lalaki ang prostate enlargement. Nasabi rin niya na isa raw sa mga sintomas nito ang hirap sa pag-ihi na siya ring problema ko. Ano ang prostate enlargement at ano ang mga sintomas nito? — Geraldo

Sagot

Ang prostate enlargement o benign prostatic hyperplasia (BPH) ay ang paglaki ng prostate gland sa kala­lakihan. Ang prostate gland ay parte ng reproductive system ng mga lalaki na matatagpuan sa bandang ilalim ng pantog.

Ito ay gumagawa ng prostatic fluid na suma­sama sa semilya o sperm cells tuwing nilalabasan. Mahalaga ito dahil kailangan ng sperm cells ng protek­siyon mula sa acidity ng vagina.

Ang prostate enlargement ay karani­wang nangyayari kapag nagkakaedad ang lalaki. Natatamaan nito ang urethra (daluyan ng ihi palabas ng ari) kaya nararanasan ang masakit at mahirap na pag-ihi.

Bukod sa pagtanda, hindi pa natutukoy ang mismong sanhi ng BPH. Mayroong mga pagsusuri na ito ay mayroong kinalaman sa hormones. Mayroon ding mga pag-aaral kung saan mas malaki ang chance na magka-BPH ang lalaking mayroong diabetes at hypertension.

Narito ang ilan sa mga sintomas ng prostate enlargement:

• Masakit na pag-ihi

• Madalas na pag-ihi

• Hirap magpigil ng ihi

• Hindi makaihi

• Pagkakaroon ng dugo sa ihi

• Paggising sa gabi para umihi

• Mahinang pag-agos ng ihi

Maaaring magdulot ng ibang kumplikasyon ang BPH tulad ng urinary tract infection (UTI) at mga sakit sa bato at pantog.

Kung ang mga sin­tomas ay hindi gaanong nakasasagabal, maaaring ipagpaliban ang pagpapagamot o operasyon, ngunit, mahalaga ang regular na check-up upang ma­subaybayan ang paglaki ng prostate gland.

Mga gamot na maaaring makabawas sa mga sintomas ng BPH:

• Alpha blockers tulad ng terazosin, doxazosin at tamsu­losin — Nakatutulong itong pampa-relax sa pantog at prostate upang bumuti ang paglabas ng ihi.

• 5-alpha reductase inhibitors tulad ng finasteride at dutas­teride — Pi­nipigil nito ang pagdami ng DHT na puwedeng maipon sa prostate at ikalaki nito.

Sa ibang kaso, ma­aaring pagsamahin ang pag-inom sa mga gamot na nabanggit ngunit, kumonsulta muna sa doktor.

Magpatingin sa doktor kung kayo ay may mga sintomas ng prostate enlargement upang mabig­yan ng tamang lunas ang inyong karamda­man.