Pulis at sundalo sa mga iskul, lalo lang magtutulak na magrebelde ang mga mag-aaral

IMEE R. MARCOS / BUKING!

NAKU, ha? Hindi naman yata ubra ‘yung merong mga umaali-aligid sa mga kolehiyo at unibersidad na mga pulis at sundalo para bantayan ang ating mga bagets na nag-aaral.

May tsika na para raw mapigilan ‘yung mga bagets na mag-join sa mga militanteng grupo ay dapat daw pagbantayin ang mga pulis at sundalo sa loob ng mga eskuwelahan.

Naku po, eh, di lalo lamang nagmaktol ang mga bagets at grupong kaliwa sa ganitong hakbangin?

Lalo lang lalakas ang “recruitment” ng mga grupong maka-kaliwa kung itutuloy ng pamahalaan ang plano nitong pabantayan sa mga pulis at militar ang mga aktibidad ng mga estudyante sa loob ng mga paaralan.

Para lang nating itinutulak ang mga mag-aaral na lalong sumali sa mga “progressive organizations” kapag pinapasok ang mga pulis at sundalo sa universities at colleges. Imbes na bigyan natin ito ng solusyon, aba, feeling ko, lalo lang itong lalala. Keri ba ‘yun?

Dapat ang paaralan ay manatiling simbolo ng karunungan. Hayaan natin ang kabataan na bumuo ng kanilang organisasyon bilang alternatibo sa inilalakong ideya ng mga grupong maka-kaliwa.