Bus driver at konduktor, huli sa aktong nagsa-shabu

KALABOSO ang bus driver at kanyang konduktor matapos mahuli sa aktong nagsa-shabu sa loob ng bus sa Valenzuela City, kahapon.

Kinilala ni Valenzuela Police Station Drug Enforcement Unit (SDEU) Head P/Capt. Segundino Bulan, Jr. ang mga naarestong suspek na sina Bryan Arrozal, 38, bus driver at Rolly Layuso, 36, konduktor.

Sa nakarating na ulat kay Valenzuela Police Chief Col. Carlito Gaces, alas-8:30 ng umaga nang makatanggap ng tawag sa telepono mula sa concerned citizen ang mga operatiba ng SDEU hinggil sa nagaganap na pot session sa loob ng nakaparadang bus (TYS 403) na nakapangalan sa ilalim ng JETBUS, sa harap ng Valenzuela City Hall, McArthur Highway, Malinta.

Agad tinungo nina PSSg. Lastimoza, PCpl. De Chaves at PCpl. Marcos ang naturang lugar na nagresulta sa pagkakaaresto sa mga suspek matapos mahuli sa aktong nagsa-shabu sa loob ng bus. Narekober sa mga suspek ang tatlong sachets ng hinihinalang shabu at drug paraphernalias.