Korupsiyon ang pundasyon ng mga partido, period!

KA AMBO / BISTADO

ANIBERSARYO ngayon ng pagbomba sa Plaza Miranda.

Malinaw ang record, komunista ang may kagagawan!

◘◘◘

ANIBERSARYO rin ngayon ng pagkamatay ni ex-Sen. Ninoy Aquino.

Tanging LP leader na wala sa Plaza Miranda nang bombahin, pero hindi siya nakaligtas sa asasinasyon!

◘◘◘

SA tinagal-tagal ng panahon, nananatiling isyu ang Liberal Party.

Nasapawan nito ang karibal sa two-party system na Nacionalista Party!

◘◘◘

MAGULO ang NP bagaman umaaktong lider ang mag-asawang bilyunaryo.

Sina House Speaker Alan Peter Cayetano, ex-vice-presidential candidate “Bongbong” Marcos at ex-Sen. Antonio Trillanes IV ay mga kabilang sa NP.

Silang tatlo ay NP vice-presidential candidate na tinalo ng nag-iisang LP na si Leni Robredo sa isang kaduda-dudang bilangan!

◘◘◘

NAKAMARKA sa LP ang pagiging oposisyon at hindi matukoy ang disposisyon ng NP dahil hindi naman nila itinitiwalag si ex-Sen. Trillanes para mamarkahan silang pro-Duterte.

Magulo ang NP, taliwas sa LP na may malinaw na liderato!

◘◘◘

Pero, hindi sapat ang liderato upang maging matatag ang organisasyon.

Kailangan pa rin ang malinaw na mithiin, misyon, direksiyon at disposisyon!

◘◘◘

SA U.S., malinaw na ipinakikita ang katatagan ng Democrats at Republican.

Hindi nakasalalay sa liderato ang political party, bagkus ito ay nakapundasyon sa prinsipyo, direksiyon, disposisyon at plataporma de- gobyerno!

◘◘◘

TUMITIWALAG ang mga miyembro ng Democrats at Republican kapag isinusuka nila ang prayoridad at plataporma ng kanilang political party.

Nananatiling matatag ang dalawang political parties kasi tumitiwalag o naglalayas ang sinuman sa mga pumapalag sa prinsipyo ng kanilang grupo!

◘◘◘

KAKAUNTI ang nakauunawa kung ano ang kahalagahan ng politika, partido o kilusang kinaaaniban.

Sumasali lang ang mga pulitiko sa grupo para sa kanilang personal na interest.

Kapag hindi sila makikinabang o mabibigyan ng poder o “pork barrel”, lalayasan nila ang partido!

◘◘◘

KORUPSIYON ang pundasyon ng LP at NP, ang mga haligi ang utak ng pandarambong sa kaban ng bayan kakutsaba ang kanilang mga miyembro.

‘Yan ang mapait na katotohanan!