Kahit marami ang namamatay | Pagtataas ng presyo ng baboy sa merkado, hindi dapat samantalahin!
ADOBO, sinigang, nilaga at lechon, ilan lang ‘yan sa mga pagkaing puwedeng sangkapan ng baboy na patok talaga sa mga Pinoy. Kaya kahit nakapagpapataas ng kolesterol, sige pa rin tayo sa paglamon. He-he-he!
Gayunman, nagbabala ang Department of Agriculture (DA) sa mga hog raiser o nag-aalaga ng baboy sa bansa na huwag samantalahin ang pagtaas ng porsiyento ng pagkamatay ng mga ito para itaas din ang presyo sa mga pamilihan o merkado.
Ito ay dahil ayon kay Agriculture Secretary William Dar, sapat pa rin umano ang supply ng karne ng baboy, kaya hindi magiging makatwiran kung ito ay magmamahal, lalo na ngayong hindi na alam ng mamamayan kung paano pagkakasyahin ang pera sa kanilang mga gastusin sa araw-araw.
Gayundin, nakatutuwa na tutulong ang grupong Samahang Industriya ng Agrikultura (SINAG) sa pamahalaan para matiyak na mananatiling stable ang presyo ng karneng baboy at walang makalulusot na mga pasaway na negosyante at tindero. Kaya, humanda na kayo!
Samantala, kung noon ay 2 porsiyento lamang ang mortality rate ng mga alagang baboy, ngayon ay pumalo na ito sa 6 porsiyento, ayon sa Bureau of Animal Industry.
Kaya, kasabay ng pagsusuri ng DA sa mga posibleng sakit na dahilan ng pagkamatay ng mga baboy, nananawagan tayo sa lahat na mag-ingat nang sa gayun ay hindi tayo mapahamak.
‘Ika nga, mas mainam nang maging handa kaysa mahuli ang lahat!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments