Nilagnat, mga magulang walang pampaospital | BEYBI, INILIBING NANG BUHAY
KASONG parricide ang kinahaharap ng mag-live-in partner sa Cagayan de Oro City, matapos na umano’y ilibing nang buhay ang kanilang anak.
Kinilala ang mga suspek na sina Bonifacio Endieres at Marilou Quibol, pansamantalang naninirahan sa Sitio Pasil, Bgy. Kauswagan.
Ayon kay Police Major Ian Borinaga, lumabas sa kanilang inisyal na imbestigasyon na namatay ang 9-buwang sanggol noong Hulyo 18, matapos lagnatin.
Sa gitna ng napakataas na lagnat ay hindi na umano naisugod ng mag-asawa ang kanilang anak dahil sa kawalan ng pera.
Nang inakalang namatay na ay agad umanong inilibing ng dalawa ang beybi sa likod ng kanilang inuupahang bahay.
Huwebes ng umaga nang mahukay ng pulisya ang bangkay ng sanggol matapos isumbong ng mga residente sa lugar. Naniniwala umano ang ilang residente na maaaring buhay pa ang bata nang ilibing dahil hindi ito naisugod sa ospital para opisyal na maideklarang patay.
Patuloy na ang imbestigasyon sa kaso kasunod din ng natanggap na impormasyon na sinasaktan umano ng lalaki ang kanyang anak kaya ito nagkasakit.
Comments