Baha at madilim na daan, tagumpay ang hatid sa nanaginip
Salaminin natin ang panaginip ni Jeane ng Jeane_ Hari@facebook.com
Dear Professor,
Hindi ko nagustuhan ang panaginip ko kagabi, pero hindi na ito nawala sa isip ko.
Umalis ako sa bahay at pag-uwi ko ay bahang-baha na ‘yung kalsadang dinaraanan ko. Nakaramdam ako ng takot kasi sobrang dilim ng kalye, pero nilabanan ko ‘yung takot dahil iniisip ko ‘yung dalawang anak ko. Sa awa ng Diyos, nakauwi ako nang maayos.
Ang ipinagtataka ko lang, bakit pagdating ko sa amin ay wala namang baha, nagulat pa ako dahil marami nang bumili sa aming tindahan, eh, sa totoong buhay ay mahina ‘yung tindahan namin. Natuwa ako dahil kahit sa panaginip ay maraming bumibili sa amin.
Ano kaya ang ibig sa sabihin nito?
Maraming salamat!
Naghihintay,
Jeane
Sa iyo Jeane,
Walang may gusto sa madilim at bahang daanan, gayundin, sa masikip, matinik, mahirap pang lakaran at maraming nakakatakot na mga hadlang.
Marami naman ang magkakagusto sa daang masarap lakaran, madaling humakbang at walang mga hadlang.
Kaya lang, ang sabi ni Lord Jesus Christ, ‘yung una ang tamang daan at ang huli ay ang maling daan. Sa unang daan, dadalhin ang tao sa tunay na kaligayahan at kaligtasan habang ang ikalawang daan ay ang magdadala sa tao sa kapahamakan.
Saan ka pa? Eh, ‘di sa una! Pero, hindi ito ang nakikita natin sa mga tao dahil ang gusto ng mga tao ay ang mabilisan at walang kahirap-hirap na paraan ng pagpapayaman.
Sabi ng panaginip mo, piliin mo ang daan kung saan ikaw ay mahihirapan dahil sa dulo ng iyong mga paghihirap, naroroon ang wagas na kaligayahan sa buhay.
Hanggang sa muli,
Professor Seigusmundo del Mundo
Comments