UPDATE NG MUAY THAI AT DARTS SA TOPS; SHEAMUS, NASA BANSA

MGA kababaihan ang bida sa idaraos na Tabloids Organization in Philippine Sports (TOPS) kung saan sina Muay thai Association of the Philippines secretary-general Pearl Managuelod at Darts champion Lovely Mae Orbeta ang papagitna sa 35th “Usapang Sports” ngayong Huwebes, Agosto 15 sa National Press Club sa Intramuros.

Maghahayag si Managuelod ng update hinggil sa paghahanda ng bansa sa muay thai sa nalalapit na 30th Southeast Asian Games, maging sa Women in Sport activities. Si Managuelod na may kursong Sports Psychology sa University of Ottawa-Canada, ay dumalo sa Philippine Olympic Committee General Assembly sa Diamond Hotel kamakalawa. Tatalakayin ni Orbeta, palayaw na “Bebang” sa local at international darts circuit, ang patungkol sa kanyang kampanya sa Southeast Asia Tour 2019 sa Sabah, Malaysia ngayong weekend. Ang 14-year-old student ng Lakandula High School sa Tondo ay nasa ranked No. 1 female darter sa Southeast Asia ng Dartslive (Malaysia/Singapore). Ang Amber’s Best-supported na si Orbeta ay nakapanalo sa unang dalawang legs ng SEA Tour sa Malaysia noong Abril at Hulyo ng taong ito. Pakay niya ang ikatlong diretsong titulo sa ladies division ngayong buwan.

Samantala, balik-Manila si dating WWE World Heavyweight Champion Sheamus sa unang pagkakataon mula nang nakaraang tatlong taon para sa isang special meet & greet sa WWE Universe ngayong Huwebes na idaraos sa Skinny Mike’s Sports Bar sa Bonifacio Global City ng 3:30 p.m.

Si Sheamus ay isa sa most decorated athlete ng sports-entertainment, four-time WWE World Heavyweight Champion, two-time United States Champion, multi-time Tag Team Champion at kampeon ng 2010 King of the Ring, 2012 Royal Rumble at 2015 Money in the Bank. Kilala siya sa ‘offensive style of fight’ para talunin ang gaya nina Triple H, John Cena, Big Show, Randy Orton, at Daniel Bryan na lahat ay tinapos sa tinaguriang Brogue Kick ni Sheamus sa isang record-breaking 18-seconds sa Wrestlemania XXVIII. (MC)