Hearing kaugnay ng provincial bus ban | MMDA CHAIR, NO SHOW

DISMAYADO si Senadora Grace Poe sa hindi pagdalo ni Metropolitan Manila Development Authority (MMDA) Chairman Danilo Lim sa pagdinig sa Senado sa implementasyon ng provincial bus ban sa EDSA.

Ayon sa senadora, hindi umano siya natutuwa sa hindi pagdating ng kalihim, samantalang, sinabi nito na dadalo siya.

“Sentro ng ating pag-uusap ang MMDA sapagkat kayo’y nagpapatupad nito pero, ako’y medyo nalulungkot na ang chairman ninyo ay hindi dumalo, samantalang, sinabi niya na dadalo siya,” ani Poe.

“Siguro merong mabigat na dahilan, nais kong marinig bakit wala siya rito, hindi ba niya pinapahalagahan ang pagdinig na ito o hindi niya pinapahalagahan ang mga pasaherong apektado dito?” ani Poe.

Samantala, sinabi naman ni MMDA General Manager Jojo Garcia, kailangan umanong daluhan ni Lim ang isang memorandum of agreement signing na hindi ito puwedeng i-represent at hindi maaaring i-postpone.