SILVER AT BRONZE, TINUDLA NG PHL TEAM SA ASIA CUP

PINANA ng koponan ng Philippine National Archery ang tig-isang pilak at tansong medalya sa Team Events sa nakalipas na 2019 Asia Cup sa Taipei, Taiwan noong Agosto 1-7 bilang paghahanda sa nalalapit na Southeast Asian Games sa bansa simula Nobyembre 30-Disyembre 11.

Kinapos ang grupo nina Rachelle Anne De La Cruz, Jennifer Dy Chan at Andrea Robles sa Compound women’s team, final round matapos yumukod kina Nur Aina Yasmine Halim, Iman Aisyah Norazam at Nurul Syazhera Mohd Asmi ng Malaysia sa pamamagitan ng isang shootout matapos tumabla sa 217 pabor sa huli.

Kabilang si Nurul Syazhera sa Malaysian team na nagsukbit ng gold medal sa 2017 SEAG sa Kuala Lumpur, Malaysia sa parehong event, samantalang hindi pinalad ang grupo ni Chan sa SEAG, sa parehong event, nang malaglag sa quarterfinals laban sa Myanmar.

Sa men’s side, napagwagian ng grupo nina Paul Marton De La Cruz, Andrei Johan Olano at Arnold Rojas ang bronze medal sa Compound Team matapos maungusan ang Singapore, 224-222 nina Toh Jin Pang, Chung Hee Alan Lee at Jun Hui Goh.

Samantala, parehong nabigo ang koponan ng Recurve Men’s Team nina Florante Matan, Gab Moreno at Carson Hastie at ang Recurve Women’s Team nina Phoebe Amistoso, Kareel Hongitan at Pia Bidaure na nagtapos lang sa 6th at 5th place, ayon sa pagkakasunod.

Pareho ring nagtapos sa 6th at 5th places ang Recurve Mixed squad nina Matan at Amistoso at ang tambalan nina Paul at Rachelle De La Cruz sa Compound Mixed duo. Pipiliting malampasan ng national team ang 1-silver-4-bronzes finish nito sa Malaysian meet sa Disyembre 5-9 sa Clark Parade Grounds sa Capas, Tarlac.