Ibinigay ng kapitbahay | 18 NALASON SA BUTETE
TINATAYANG 18 katao kabilang ang limang bata ang naospital makaraang malason umano sa kinaing puffer fish o butete sa Bgy. San Antonio, Ozamiz City, Huwebes ng tanghali.
Nakaranas ng pamamanhid, pagsusuka, pananakit ng tiyan at pagkahilo ang mga biktima makalipas ang ilang oras na kumain ng butete na iniluto umano ng kanilang kapitbahay.
Aabot sa apat na kilong butete ang nahuli ng isa sa mga residente na kanyang niluto na ginataan at ibinahagi sa mga kamag-anak at kapitbahay.
Hindi na muna pinangalanan ng pulisya ang kapitbahay habang patuloy nang sinisiyasat ng mga awtoridad ang insidente.
Kumuha na rin ng sample ang Ozamiz City Health Office upang masuri ang pagkain na maaaring may nahalong nakalalasong bahagi ng isda.
Ayon sa mga opisyal ng barangay, malimit namang kumakain ng butete ang mga biktima ngunit, posible umanong hindi nalinis nang mabuti ang isda at nahalo ang nakalalasong bahagi nito.
Ang isa sa mga biktima na posibleng nakakain ng mas maraming toxin ay nasa ICU ngayon habang ang isa ay paralisado na ang katawan.
Comments