Mga senyales ng pagbubuntis

SHANE M. LUDOVICE, M.D / SABI NI DOC

Dear Doc. Shane,

Ilang linggo nang delayed ang menstruation ko. Nakararanas ako ng mga kakaibang pagbabago sa katawan tulad ng unti-unting paglaki ng aking suso. Natatakot akong baka buntis ako dahil kabe-break lang namin ng ex ko. Ano ba ang mga posibleng senyales ng nagdadalantao? — Maecy

Sagot

Ang isa sa pinakamaaasahang indikasyon kung buntis ang babae ay ang paggamit ng pregnancy test. Ang pregnancy test ay maaaring gamitin nang 2-3 linggo matapos ang pakiki­pagtalik o kaya ay sa nakatakdang araw na dapat magkaroon ng regla ngunit, hindi dumating.

Narito ang ilan sa mga senyales ng pagbubuntis:

• pagtigil ng menstruation o regla nang mahigit sa anim na linggo

• pakiramdam ng pagkabuntis (lalo na sa mga babaeng nabuntis na dati)

• pagsusuka at pagkahilo na kadalasang nangyayari mula 2-8 linggo matapos ang pagtatalik

• pamamaga at paglaki ng mga suso

• pagdalas ng pag-ihi

• pagkapagod

• pagkakaroon ng stretch marks

• pakiramdam ng paggalaw sa loob ng tiyan

• paglaki ng tiyan

Gayunman, kung mapapansin ninyo, ang ‘definite signs of pregnancy’ o mga siguradong senyales ng pagbubuntis ay maaari lamang mala­man sa pamamagitan ng pagpapa­konsulta. Kung may nararamdaman kayong alinman sa mga posible o maaaring senyales ng pagbubuntis, kumonsulta sa OB-Gyne para masubaybayan at mabigyan kayo ng tamang gabay tungkol sa inyong pagbubuntis.