GIRLS BASKETBALL, DEMO SPORT SA 82ND UAAP

SA kauna-unahang pagkakataon, sa kasaysayan ng UAAP, magdaraos ang liga ng girls basketball tournament sa Season 82 bilang isang demonstration sport.

Magsisimula sa Oktubre 26 ang girls tournament kasabay ang boys basketball tournament, ayon sa event sub-host National University. “It’s long overdue for the UAAP to have a basketball tournament for the girls,” ayon kay UAAP executive director Rebo Saguisag, na sinimulan ang unang professional venture sa basketball bilang coach ng Assumption High School basketball team noong taong 2000.

Ang mga eskuwelahan na lalahok sa four-team meet ay ang Ateneo de Manila University, De La Salle-Zobel, University of Santo Tomas, at Adamson University. Umaasa ang liga na ang iba pang member schools ay palalakasin ang girls basketball program, maging ang pagtataguyod ng juniors hanggang collegiate game para sa kababaihang cagers. “This is very important for the development of our women’s players. Schools want to recruit girls out of high school who are already fundamentally sound,” ayon kay Ateneo representative to the board Erika Dy, na nag-coach noon sa Ateneo Lady Eagles mula 2013-2015. “Without a girls’ division, there is not much interest from young dreamers to begin with at that level.”

Samantala, maaapektuhan ang ginagawang preparasyon at nakatakdang hosting ng bansa ng Southeast Asian Games, magkakaroon ng triple bill ang UAAP Season 82 Basketball Tournament, kapwa sa men’s at women’s division.

Parehong uumpisahan ang men’s at women’s tournament sa unang pagkakataon sa araw ng Miyerkules—Setyembre 4 mula sa nakagawiang weekend kung saan gaya ng dati ay idaraos ang men’s games sa hapon at sa umaga ang women’s.

Magsisimula ang mga larong nakatakda sa araw ng Miyerkules sa men’s side ng 10:30 a.m., alas-12:30 ng hapon at 4 p.m. Gaganapin ang mga laro sa Araneta Coliseum, SM Mall of Asia Arena, at Ynares Sports Center sa Antipolo.

Sa women’s division, sabay na lalaruin ng alas-8 ng umaga sa dalawang magkahiwalay na venues ang unang laro at 10:00 a.m. ang isa pang laban. Idaraos ang women’s tournament sa UST Quadricentennial Pavilion, Araneta Coliseum, SM Mall of Asia Arena, at Ynares Center sa Antipolo. (VA/MC)