‘Di na pupunta sa barangay | EXPRESS LANE OPERATION PARA SA BUSINESS PERMIT

INILUNSAD kahapon ang Project Express Lane Operation (ELO) 2.0 sa Pa­rañaque City, na kauna-una­hang lokal na pamahalaan sa buong bansa na sumunod sa direktiba ni Pangulong Rod­rigo Duterte upang pabilisin ang proseso ng pagre-release ng mga permit at lisensiya.

Ayon kay Parañaque City Mayor Edwin Oliva­rez, kasama sa Project ELO 2.0 ang unang computerized occupational permit system ng bansa na bahagi ng nag­papatuloy na automation program.

Ito ang unang local go­vernment unit na naisama na ang barangay business clea­rance sa kanilang BOSS (One Stop Shop) operations sa city hall para sa pangkala­hatang pagtalima sa RA 11032 o Ease of Doing Busi­ness Act.

Kaugnay nito, hindi na kailangan ng mga may-ari ng negosyo na magtungo sa ba­rangay para mag-apply ng barangay clearance.

Ayon kay Atty. Melanie Malaya, pinuno ng Business Permits and Licensing Of­fice, sa ilalim ng proyekto, ka­­ilangan lamang punan ng occupational permit appli­cants ang isang application form na sakop ng work per­mit, sanitary o health permit at police clearance.

Isa pang kakaibang fea­ture ng Project ELO 2.0 ang Document Management Sys­tem kung saan ilalagay sa central storage ang mga na-scan na dokumento na ma­aaring ma-assess anu­mang oras ng business permit ap­plicants.

Kasama rin dito ang ap­plication tracking system na nagpapahintulot sa mga kli­yente na i-monitor ang prog­reso ng kanilang aplikas­yon.